可能我嘅朋友都比較理性（Well，係乜嘢人就識乜嘢朋友），所以細細個就隊仔女去名校幼稚園面試嘅真係非常少有。去面試實會有嘅，但係就唔會過份催谷仔女要做材藝表演或者念詩咁囉。不過我知道有啲家長去到小學就完全唔同玩法，為咗小一叩門，學樂器學語言經已係小兒科，最新玩法係俾錢人幫手執執份叩門嘅 profolio，分分鐘仲貴過搵人執 CV。係唔係贏在起跑線我真係唔知，只係個個份 profolio 嘅格式都係差唔多，咁樣真係對個小朋友好咩？
近日有套電影叫做《起跑線》就係探討呢個現象，戲中一家有個女要升學，屋企環境亦唔差，做生意算係小富。為咗個女嘅前途，亞媽係咁迫個老公諗計去讀果區有名嘅五間學校。戲中嘅學校靚到咩咁，其實我哋香港都唔弱呀，例如屯門嘅哈羅香港國際學校，你唔係有返幾千個都唔好打算入去讀。不過戲入面嘅一家就無咁好彩，因為爸爸唔係 blue blood 而係後天發奮搵到錢果種，俾人睇唔起所以四間學校都無收佢。成套戲就係圍繞佢哋扭盡六壬希望入到第五間學生嘅經過。
印度片，老實我少睇，是關我唔係太鐘意過份勵志，例如印度劉德華做果啲，我會起雞皮。之但係《起跑線》唔係硬谷我要努力向上，最威豬咪頂多最後跳返 part bollywood，輕輕鬆鬆講佢要講嘅嘢，笑吓笑吓又真係唔錯傢喎。至於演員方面我淨係知道男主角係做《少年Pi》果個，其他人就唔係好熟啦，不過完全唔會阻止到呢套戲嘅好睇程度，尤其係做媽媽果位，佢幾靚女，而且啲七情上面法，就算唔識印度文唔駛睇字幕都明白佢講緊乜嘢，佢次次講個女讀唔到名校就會咁咁咁點點點然後暴走完全唔會覺得煩厭，反而覺得佢好鬼死可愛。
戲入面有好多場口對於相信讀要讀名校、識要識名人，要學到十項全能嘅家長真係大巴大巴咁車埋去。雖然年年 DSE 狀元唔係 St. Paul’s Co-ed 就係皇仁華仁，但仍然都有好多屋村學生得到好成績，迷信嬴在起跑線嘅家長真係要響開學之前睇吓呢套片長兩個幾鐘嘅戲，除咗了解入名校係件幾咁困難嘅事，貧窮嘅人讀到名校免你學費都好難搵錢交雜費傢，死咗條心去開學啦！
《起跑線》
Hindi Medium
導演：薩卡．查德利
演員：伊凡．卡漢，莎芭．卡瑪，內哈．迪胡皮阿
片長：小時12分
級別：IA 級
語言：印度語 ( 中英文字幕 )
上映：30.8.2018 ( 公映 )
印度德里一對中產夫妻拉吉・巴特拉（伊凡・卡漢 飾）和米塔（莎芭・卡瑪 飾）望女成鳳，認為女兒要贏在起跑線，入讀貴族名校，會講英文，才能躋身人生勝利組。夫妻奇招盡出爭取讓女兒進入貴族名校的機會，不僅與女兒參加補習班惡補面試技巧，又搬到富人名校網社區，可惜連試幾間也失敗收場。經高人指導，拉吉・巴特拉一家決定假扮低收入家庭搬到貧民區，博取低收入家庭的名校保障名額。究竟他們出盡渾身解數，最終能否如願以償？
